جداول الضرب

       في احدى مدن السودان الطرفيه وفي مدرسة ابتدائية نائية ... وفي احد الفصول المتقدمه يجلس التلاميذ في ازعاجهم المعهود ... يدخل عليهم استاذ الرياضيات الجديد ... شاب اتاهم منقول من ابناء العاصمة له جسم رياضي وقوي البنية ومعتد بنفسه ... تدل سحنته على انه تم اختياره خصيصا لهذا الفصل .. يحمل الاستاذ في يده سوطين احدهم سوط عملاق وطويل جدا والسوط الثاني صغير ورقيق .. بعد ان يدخل الاستاذ ويعم الهدوء يسلم عليهم ويرفع السوطين ويقول لهم عارفين السوطين ديل ليه ؟؟؟

ويواصل الاستاذ : اولا السوط الكبير دا للعتاوله الصعاليك الكبار البلده القاعدين ورا ديلك

والسوط الصغير دا للشطار الصغار القاعدين قدام ..

بعد ان يكمل الاستاذ جملته يحدث هرج في الصفوف الخلفيه ويبداه ابكر :

ابكر:أءأءا خلي بالكم يا جماعة الاستاذ الجديد دا عندو ازدواجيه المعايير

هارون : يعني شنو ازدواجيه المعايير يا ابكر ؟؟؟

ابكر : ما تعرف انت ما مثقف ولا شنو ياخ ؟ زي مجلس الامن ياخ ..

عيسى : مانا ما سمعت رادي من قبل كم شهر ويطلع شنو مجلس الامن دا يا ابكرونا ياخي ؟؟؟

في هذه اللحظة ينتبه الاستاذ للحوار الذي يدور في آخر الصف ويبدا يتحرك نحوهم .... موجها الحديث لابكر 

- مالك ماعجبك الكلام الانا قلته طيب رايك شنو نبدا بيك انت 

: اولا اسمك منو انت 

ابكر : ابكر عثمان حاج اسحاق

الاستاذ : يلا يا ابكر سبعة في ثمانية بكم 

ابكر : سبعاه في تمانية؟؟؟

الاستاذ: اايي سبعة في ثمانية ما سمعتها

ابكر : ما بتمانية واربعين

الاستاذ: تمانية واربعين يا بليد امشي اطلع بره انتظرني عند السبورة هناك

الاستاذ : قوم انت موجها السؤال لهارون : انت اسمك منو 

هارون : هارون موسى عبد الله

الاستاذ : سبعة في ثمانية بكم يا هارون .... ما في واحد يتكلم والا حا اجلد الفصل كله ...

هارون :: يا استاذ يمكن ثمانية وخمسين ويمكن اثنين واربعين بس انا ما متاكد يعني...

الاستاذ : يا سلام ما متاكد امشي اطلع بره انا حا اخليك تتاكد بعدين .

موجها الحديث لعيسى بعد التعرف واكيد ما عرف الاجابة ثم كذلك على ثم تبعهم عمر الى ان تجمع الثمانية الكبار امام السبوره لم يستطيع اي واحد منهم ان يفك طلاسم سبعة في ثمانية ... في اثناء جولة الاستاذ في الصفوف الخلفية كان ابكر يدير حوارا مع الذين تجمعوا معه قرب السبوره .

ابكر :: شوفوا هنا ياشباب الظاهر الاستاذ الجديد دا حقار وعامل فيها بتاع (عنكبة ) وانا الليلة لازم (اشنكبو ) ليكم عشان يعرف حاجة .

هارون : يا ابكر ياخي ماتكون زول متهور ياخ ... انت الاستاذ الفات الجلدته داك قربنا ننفصل بسسبك كان ما اتدخل حاج عمر شخصيا وحل لينا المشكلة مع الناظر .

ابكر : شوفو هنا ما انتو عارفين انا زول جني وجن الحقارة بتاعة المدرسين .. لازم الاستاذ يدرس حصته بادب ويتخارج هو ماله ومالنا ونحن مالنا ومال سبعة في ثمانية ولا في زفت ... افرض ما عرفتها يعني القيامه حا تقوم ... يمين الاستاذ دا يجلدني الليلة اشنكبو ليكم نهاية الحصص لامن يعرف حاجة والعايز يجي معاي يجي والما عايز بطريقته انا براي اقدر اخلص الموضوع .

عيسى : يا بكر انت عارف نحن بيناتنا ميثاق انتفاضة عديييل كدا ياخي ونحن ماراح نتخلي عنك وانت تواجه التحديات لوحدك يعني ... وعاش تحالف البلده ويسقط الشاطرين واي واحد يحفظ جدول سبعة زاتو يا خي ...

ابكر : تمام يا عيسى انا من اول عارف انت الفيها يا خي وانت العشم ذاتو ياخي 

وبصوت جماعي الباقين ... نحن معاك يا ابكرونا قال احدهم الليلة الاستاذ الجديد دا نرجعوا الخرطوم في لفة جبس ..

الاستاذ بعد ما خلص اسئلة الصف الامامي جا الى ناحية السبورة .. واقام احد تلاميذ الصفوف الامامية وقال له اذهب الى الصف الثاني ونادي اكبر اربعة فيه عشان يشدو البلدة ديل 

التلميذ : لكن يا استاذ ديل اكبر اولاد في المدرسة وما في اكبر منهم 

الاستاذ:طيب اجلس مكانك .. يلا تعال انت اتكل على الدرج دا .. 

وبدا في الجلد ... تم جلد كل التلاميذ الا ان جاء دور ابكر 

ابدى ابكر في الاول مقاومة وحاول مسك السوط من يد الاستاذ ولكن الاستاذ انتزع الصوت بقوة من ابكر وبدا يضربه عشوائيا في كل انحاء جسده ... مما زاد من حقد ابكر وقرر الا تتوقف العملية في الجبس فقط كما اقترح احد اصدقائة ربما تصل الى صندوق خشبي عندما اعماه الغضب وهو يذهب ناحية مكانه

جلس ابكر في ناحية الصف حانقا حاقدا ينظر الى الاستاذ بغضب شديد ويحسب الساعات متشوقا الى نهاية الحصص حتى يربط هو اصدفائه لهذا الاستاذ الحقار .. ويعطونه درس في قلة الادب ... لم يسمع شيئا ولم يرى الى ان اخيرا ضرب جرس الحصة الاخيرة وبدا التلاميذ يخرجون من الفصول ..

جلس ابكر واصدقائه في ظل شجره خارج المدرسة ينتظرون ان تفرغ المدرسة تماما كما ينتظرون خروج الاستاذ الجديد ... بعضهم احضر فروع من الشجر وبعضهم احضر عصا مدببة كان يحتفظ بها للطوارئ

ولحسن حظ او لسوء حظ ابكر كان استاذ الرياضيات الجديد اخر من خرج من المدرسة ... بعد ان ذهب جميع التلاميذ والاساتذة والاهم من الكل الناظر نفسه اذا العملية لن يكون فيها شهود اثبات .. كما فكر ابكر ... لم يبقى سوى استاذ فيصل المنتظر ... والذي خرج اخيرا من المدرسة يحمل في كتفه شنطته المعتاده وهو يرتدي بنطال الجنز وحذائه الرياضي ... وخرج مسرعا كعادته كانه في تمرين رياضي ...

لم ينتبه الاستاذ في الاول لابكر واصدقائه بانهم متجمعون ... وفجاه التفت لصوت ينده له من الخلف 

- انت يا استاذ يا فارة عامل لينا فيها شفت الليلة تعال نشوف شفتنتك دي حدها وين ..

وقف الاستاذ في الاول ثم ابتسم لهم وانزل شنطته واخرج منها عصاتين قصيرتين موصلات بقطعة بجنزير في النص ووضع شنطته في الارض.

وهنا تحمس ابكر وجماعته وهاجموا كلهم في مره واحده بعصيهم على الاستاذ ... ولكن لخيبة املهم لم يستطيع اي واحد منهم ان يوجه ضربه للاستاذ او يصيبه .. فهو اما كان يصرفها بالالة التي يحملها او يقفذ في الهواء موجها ركلة لاحدهم . وبالعكس هم بدات الدماء تتقاطر منهم واحدا بعد الاخر . كان الاستاذ يقفذ في الهواء تارة ويركل احدهم اخرى .. وقد كان الانين يصدر من ابكر وجماعته فقط ... وكثرت عباراة من نوع ...( اي انا يدي اتكسرت ) بدا بعضهم ينسحب ويجري ... اخيرا ابكر قرر ان ينسحب بعد ان كسرت يده وبدا يجري فعلا ... هو جاري 

صرخ فيه عيسى : يا ابكر الحل شنو نعمل شنو مع بروسلي دا 

يرد ابكر : يا اخوي اجري اتخارج بس خلي بالك دا استاذ من اليابان ما من الخرطوم ..

هارون : طيب بكره كيف يا ابكر 

ابكر : نحفظوا جداول الضرب ما في طريقة بعد كدا ولا نسيبوا المدرسة .

******************

في اليوم التالي عصر الجمعة وفي برش امام دكان الحاج عثمان والد ابكر انعقد مجلس اباء طاري يتكون من اباء الاولاد المصابين .. وقد زاع خبر الاستاذ في الحلة والذي هزم لوحده ابكر وعصابته التي كانت تسبب الرعب لاهل الحي وللمدرسين ايضا ..

اجتمع الاباء ومعهم ابناؤهم وكلهم اما يربط عصابه في راسه او جبيره في يده وبعضهم اكتفى بوجهه المتورم فقط ... بمسحة سريعة لم ينجو احدهم من وسم زرعه له الاستاذ الجديد .

كل المجتمعين كانوا من اباء المصابين عدا واحد خضر الخدرجي وانما جاء ليشمت منهم كما اعتقدوا هم ..

وابتدر الاجتماع حاج عثمان والد ابكر :

عثمان : يا جماعة طبعا كلكم عرفتوا الحاصل امس مع اولادنا فلزات اكبادنا .. ما فيهم واحد والا دمه نزل الارض مع الاستاذ الشرير المسلط علينا من الخرتوم .

يقاطعه خضر : اشتاذ شرير انت كنتوا وين لمن اولادكم رقدوا الاستاذ الفات شهر في المستشفى هسع القدر عليهم بقى شرير ..

يتدخل ابو هارون : دا كلام صحي يا حاج عثمان نحن اولادنا عشان يتعلموا لازم يحترموا المدرسين اولا يا خي المثل يقول من ( من علمك حرفا سرت له عبدا )،،، ما تخلي عندك بعد نظر وخليك واقعي كمان ياخي ..

يتدخل ثالث : يا اخوانا نحن لازم ندرس الموضوع من النواحي الاستراتيجية اولا ... يعني الاستاذ القدر يخوف اولادنا الشياطين ديل لازم نعضي عليه بالنواجز .

يتدخل الرابع : يا اخوانا نحن بدلا ما نفتي في الموضوع ما نسال اصحاب الشان ناس ابكرونا ذاتهم رايهم شنو في الوضع ... يعني كان اخذوا فرصة تاني ما يقدروا ينظموا الاستاذ دا براهم...

يتدخل خامس : دي وجهة نظر سليمة (آآآي ليه ]اني نحن نفتي في موضوع واصحاب الحق ساكتين .. اها رايكم شنو يا ابكر يا ولدي..

ابكر : والله ياجماعة انا فجاه كده صحيت ونحن طريقتنا ديك ما كانت سليمه ونحن عشان نتعلم لازم نذاكرو كويس ولازم نحترم الاستاذ بتاع الرياضيات ونحن لينا خمسة سنوات في صف سادس ما قادرين نتحرك منه ...

هنا يتدخل خضر الخدرجي : استاذ الرياضيات براه عشان ادبكم انتو لازم تحترموا كل المدرسين ولا دي ازدواجية المعايير ..

هنا ينط هارون صديق ابكر 

هارون : ازدواجية المعايير تاني ... يمين ابكر من قال الكلمة دي في الفصل تاني ما شفنا عافية ..

يتدخل عم عثمان : خلاص يا اولادي ما دام راح ترجعوا وتواصلوا مع الاستاذ ما في مشكلة ... لكن تاني لو عمل معاكم عنكبة .. ما في طريقه غير نكلم ليه فكي عيسى يعمل ليه عمل يطيروا ليكم ابيي ذاتها ياخي خليه يمشي يعمل ازدواجية معايير هناك .. ولا رايكم شنو يا حجاج .. حاج سليمان انت ما ادليت بريك من قبيل ساكت ..

حاج سليمان : انا من قبيل قاعد ادرس البعد الاجتماعي للموضوع من الناحية الاستراتيجية .. ولكن انا اعتقد انه من وجهة نظري المتواضعة ... انه و كما قال المثل المصري العين ما تعلا على الحاجب ... ولا انتو رايكم شنو في وجهة النظر دي ..

- كلامك ميه المايه وفوق راسنا من فوق .. خلاص نحن نشكل لجنة اولا تروح تعتذر للاستاذ اولا وبعدين نؤكد انه الاولاد لازم يلتزموا في المذاكره ولازم يحفظوا جدول الضرب ...

حاج سليمان : هو الاستاذ مش اداهم جدول الضرب دا ... انا لمن جاء ولدي هارون يدو مكسوره سالته دا شنو يا ولد قال لي دا ما جدول الضرب .. وقلت ليه هو جدول الضرب ما ممكن الا يكون كسر زمان وين جدول الضرب دا ... قال لي يا ابوي ما زمان الاساتذة القدام ما كانوا حافظنوا كويس لكن الاستاذ بتاع الخرطوم دا حافظو صم ..

في ذلك اليوم قرر اباء الطلاب المتضررين من هجوم الاستاذ الغاشم وضربه للحركة الطلابية في مقتل عفوا في مكسر ومجندلا ابطالها بين جريح وكسيح ... عندما درس الاباء هذا الامر وقرروا ان ابنائهم هم الغلطانين ويستاهلوا ما جرى لهم ... اخيرا قرروا ان يذهبوا للاستاذ ويعتذروا له ... مع وضع خط رجعه لو ان الاستاذ تمادى في الحقارة بابنائهم واذلالهم في هذه الحالة سيستعينوا بالساحر الفكي حاج خامس ... حتى يعمل له عمل يطفشه من البلده طالما لايوجد احد يستطيع ان يضرب هذا الاستاذ الياباني وينتقم منه ....

وحتى سار همس بين نساء الحي الحاجة حبصة ام ابكر قالت متحسره على علقة ابنها ...( دا استاذ شنو يا بنات امي دا استاذ الياباني ) نطقت بنتها اشراقة مقاطعة(دا ما ياباني يا يمه انتي حاتصدقي التخاريف بتاعة الاولاد ديل . دا من اولاد الخرطوم قالوا متدرب كراتيه كان في الصين كان في اليابان ما بعرفه .. وجابوه مخصوص عشان يادب اولادكم الصعاليك ديل )... 

ذهب مجلس الاباء في عصر نفس اليوم الى ميز المدرسين وسالوا عن استاذ فيصل وفعلا بداوا يعتذروا له ..

حاج ابكر : والله تمسحا لينا في وشنا يا استاذ والاولاد ديل ذاتهم غلبنا النسويه معاهم

استاذ فيصل : ما في مشكله يا حاج حصل خير 

حاج سليمان : ( اساسا الاولاد ديل ما عندهم بعد نظر اخلاقي منذ ان ترعرعوا في هذا الحي يا استاذ .. ومن يزرع الياس يحصد الفشل يا استاذ وانت سيد العارفين طبعا .)

استاذ فيصل : فيكم الخير وانتو اهلنا وهم اخواني قبل ما يكونوا اولادكم ونحن جايين هنا عشان نعلمهم ونربيهم وينفعوا انفسهم قبل ما ينفعوا أي حد ثاني وانا متشكر لزيارتكم دي وهي محل تقدير واعزاز لي ..

حاج هارون : يا سلام يا استاذ وانت الظاهر عليك من اصل طيب ونحن من دورنا أي حاجة تطلبها مننا نحن جاهزين ..

استاذ فيصل :: خلاص متشكر يا جماعة .. كل الانا عايزه انه الاولاد يحفظوا جدول الضرب لانه دا اساس الرياضيات والامور حا تمشي بعد داك ..

حاج عثمان : نحن راح نبدا معاهم من اليوم وليك علي الولد ابكر بكره تلاقيه حافظ كل شئ . يلا مع السلامه الله يدي العافية يا استاذ ..

وفعلا انفض الجمع الكريم وحاج عثمان قال لابنه ابكر بكره ماراح تمشي المدرسه لو ما حفظت جداول الضرب حتى لو تساهر للصباح ... 

وفعلا جلس ابكر طول الليل يذاكربصوت عالي (سبعة في ..... سبعة وووو) واخيرا اقتنع بحفظه ونام .. ولكن لشدة التعب سرقته نومه ... لولا امه صحته لما قام في صباح السبت 

(ابكر يا ولدي قوم انت ماعندك مدرسه الليلة ... الساعة كم ,.... سبعة .... الحق ... لبس ملابسه سريع بد ما تسوك ... خطف شنطته وجرى نحو المدرسة ... ولسوء حظه وجد الجرس ضرب والتلاميذ واقفين طابور ... بقى في حيرة من امره .. اولا في الطابور واقف الناظر ومعه جميع الاساتذه ويبدوا انهم يناقشون مهاجمة الاستاذ يوم الخميس والتي كان هو قائدها بنفسه ... ويلاحظ الاستاذ نده لاصحابه في العصابه وبدا الجلد مره ثانية ... يعني ما كفاية جلدة الاستاذ بطل الكراتيه ... ويبدوا انه المدرسه كلها تقوت بالاستاذ الجديد والناظر نفسه برزت شخصيته ... فكر ابكر قال لو دخل على الطابور في هذه اللحظة سيتحول الموضوع كله ناحيته هو اذا ما الحل ؟؟ ... اخيرا فكر انه يختبي خلف سور المدرسه الى ان يصل طابور فصله قريب منه بعد ذلك ينط السور ويقف مع الطابور ويدخل الفصل ...

وفعلا بعد ما خلص المهرجان من الجلد والتعذيب تحرك الطابور .. واول ما حاذى الطابور مكان ابكر صعد ابكر في السور وقفذ ناحية فصله ولكن لسوء حظه 

كان في هذه اللحظة الغفير رجل طاعن في السن نزل المعاش من الاشغال العامه قبل عشرين عاما مارا بين السور والطابور..سقط ابكر في راسه ليسقط الغفير مغشيا عليه ... وتتجمع المدرسة من جديد بعد اسعاف الغفير يعلن الناظر اعادة الطابور .. وتم القبض على ابكر وتربيطه بالحبال وووو

بعد ان تم تربيط ابكر و تم اسعاف الغفير ... واتضح انها غيبوبة خفيفة وغالبا من المفاحاه والصدمة لانه بعدها برشة ماء خفيفة سرعان ما استيقظ عم صالح الغفير طلب الناظر قرع الجرس من جديد لاعادة الطابور... وبدا الضرب والشتائم تنهال على ابكر من الناظر والاساتذه مع الشتائم .. (يا بليد يا فاشل وكمان عايز تقتل الراجل الغلبان دا ... عمل ليك شنو ؟؟؟ .....ياحضرة الناظر اديني فرصة اشرح ليك ..... اخرص يا صعلوك وعندك نفس تتكلم كمان ... ماتديني فرصة يا استاذ ... اخرص يا تافه ... ولازم اليوم ابوك يصل .... رسلوا أي تلميذ ينادي ابو الفاشل دا ...

واخيرا وصل عم عثمان مفزوعا مع اصدقائه حاج سليمان وابو هارون ...

حاج عثمان :في شنو يا حضرة الناظر ،لعل الحاصل خير ؟؟؟؟

الناظر : ولدك الفاشل دا يا حاج عثمان ضرب الغفير في راسه وكاد يموته ..

حاج عثمان : انا كمان كنت متوقع الشي دا يحصل وكل الحاصل دا بسبب استاذكم الجديد بتاع الرياضيات ..

الناظر : واستاذ الرياضيات دخله شنو في الموضوع 

حاج عثمان : ما الاستاذ اصر على الولد انه يحفظ جدول الضرب كله في يوم واحد

الناظر : وجدول الضرب علاقته شنو بضربة الغفير يا حاج عثمان 

حاج عثمان : ما الولد بقى عنده شحنة زايدة من الضرب ولمن شاف الغفير حصله ازدواجيه في المعايير وقام ضربه لكن لو كان حفظ جدول الضرب واحده واحده ما كان حصل الحصل فهمت المنطق يا حضرة الناظر ؟؟؟

الناظر بعد ان بدا وجهه يتلون وعضلات وجهه تتحرك ما عرف حتى يبدا من اين يبدا وينتهي هل الموقف يسمح بان يشرح لعم عثمان ماهو جدول الضرب ؟؟؟ اخيرا لم يجد حل سوى يدعي الاقتناع بوجهة نظر حاج عثمان ويصرفه ؟

الناظر : شوف هنا يا عثمان خلاص شكرا كتر خيرك وكلامك صاح ... خلاص فكوا ابكر دا واصرف الطابور يا استاذ ..

بعد ان خرج حاج عثمان ووفده من المدرسه كانت نظرات الاعجاب تنهال على حاج عثمان من اصدقائه حاج سليمان وابو هارون ولم يخفو اعجابهم بحجته القوية التي حسمت الموقف .. 

حاج سليمان : افارم عليك يا حاج عثمان لكن ما افحمت الناظر عديل كدا ياخي

حاج : عثمان ما هو لازم يكون عندك منطق تعرف تستخدم ازدواجية المعايير في المكان الصحيح ياخي ...

انصرف القوم وعاد الهدوء والاستقرار للمدرسة وابكر وشلته والحي بعد هذه السلسلة من الاحداث 

 *************************