إرهابي

تحسس الحزام الناسف في وسطه ليتأكد من احكامه قبل ان يركب في عربة القطار .. وهي هدف اليوم .. جلس ضمن الركاب ... كانت العربة تضج بالاطفال الصغار .. طفلة صغيرة تبسمت له كأنها تعرفه . وبعد قليل نزلت من حجر امها وتوجهت ناحيته ... قدمت له قطعة حلوة كانت تحملها .. ابتسم لها ثم شرعت دموعه تنزل كالشلال ... ولم يجد بدا من فتح نافذة القطار و القفذ منها .. قبل ما يفوق الناس من دهشتهم تفاجأوا بصوت الانفجار وقطع الاشلاء التي تناثرت ثم اختفى المشهد ..

الرجل الصالح

الرجل الصالح

  يجلس الصائغ الوقور صباحا في متجره المكتظ بالمشغولات الذهبية الفاخرة والغالية الثمن .. كعادته يبدأ في اعادة ترتيب الحلي والمجوهرات بعد ان يقوم بمسحها بقطعة حرير بعناية وحرص .. هذه عادته قبل ان يحضر العاملين معه ... فجأة يدخل عليه رجل شائب اكثر وقارا يرتدي ملابس بيضاء علاوة على شعره الابيض ولحيته الكثة البيضاء ... بوجه صبوح وصوت منغم يلقي عليه تحية الاسلام كاملة غير منقوصة .. يرد التاجر بأحسن منها طالبا من الدخول وتشريف المحل ..

يتجه الزبون ناحية قسم الخواتم .. ويبدأ يختار منها في الانواع التي بها احجار كريمة كبيرة ويجرب في اصبعه ... ويسأل عن الاسعار بثقة .. يتفرغ له التاجر ويبدأ يلبي في طلباته مضيفا عبارات المدح والاستحسان للاختيارات مع توفير كامل معلوماته عن الاحجار الكريمة وتاريخها واصلها وفصلها مستعرضا معلوماته..

تقطع حديثهما امرأة شابة بهية يسبقها عطرها الذي عم المكان وبعد ان تسلم تطلب من الصائغ ان يأتيها بانواع من الاطقم الباهظة الاثمان لتقارن بينها .. بيد ان التاجر لازال مشغول في خدمة الشيخ الوقور ... المرأة تحتج للتاجر لتجاهلها لكن هو يرد بنهره : صبرا يا سيدتي الا ترينني مشغول مع هذا الشيخ الوقور ..

ترد المرأة باندهاش : أجننت يا رجل عن أي شيخ تتحدث .. انا لا ارى احدا خلافك في المكان .

يرد الرجل باستنكار ظانا أن المرأة تريد أن تقلل من مكانة الشيخ الوقور : أستحي يا أيتها المرأة الا تحترمين من هم أكبر منك سنا ؟

لترد هي ماذا تعني فأنا أقسم لك بأني الا ارى أحدا غيرك في المكان ,, يلتفت التاجر ناحية الشيخ الوقور مستنكرا بعد ان حس بنبرة الصدق في حديث المرأة .. ليجد الشيخ الوقور يتبسم ويموئ له برأسه تصديقا للمرأة ثم يكمل محدثا ليبدد دهشة التاجر قائلا : حقيقة يا شيخ صالح أنت رجل صالح فعلا .. لاني اولا انا لست بشر أنما انا ملاك تجسد في شكل عملك الصالح .. ولن يراني أحد غيرك وانما أتيت هنا لابشرك واقول لك واصل سيرك على عمل الخير فأنك على الطريق القويم .. الآن عد الى زبونتك لبي طلباتها ثم عد الي لنكمل باقي حديثنا المثمر والثري ..

تبسم التاجر راضيا عن نفسه وعن الشيخ الوقور وعاد للمرأة ليقول لها تفضلي يا سيدتي ما هو طلبك ..

تطلب منه عدة أطقم من الذهب الفاخرة وتبدا تجرب وتقيس تارة في عنقها وأخرى على ساعدها وتارة تجرب الخواتم وكل مرة تطلب منه طقم آخر حتى تجمع امامها خمسة أطقم باهظة الثمن .. وتقول للتاجر كل بضاعتك جميلة لدرجة اني أحترت لا أدري أي منها يناسبني .. لكن على الاقل ساشتري طقما واحد ان لم يكن طقمين لاحضر بهما زواج أختي .. كان من المفترض أن يحضر معي زوجي لكنه خزلني قال انه عنده عملية مستعجلة في المستشفى .. على كل حال يمكن أن اذهب وأحضر معه في المساء .

ثم تقف برهة كأنها متردده و تفتح محفظتها وتستخرج منها كرت عنوان يحمل اسم اشهر الجراحين في البلد .. وتقول للتاجر هل تعرفه .. يرد التاجر بكل فخر ومن لايعرف زوجك في البلده هذه أنه يشرفنا لو زارنا .. وتكمل المرأة ممكن كسبا للوقت آخذ الطقمين هذا وهذا لاشاوره في الاختيار لاني اثق في ذوقه فهو كما تعرف رجل رقيق وفنان ... يتلفت التاجر ناحية الشيخ الوقور من جديد ,اي عمله الصالح , فيومئ له الشيخ اماءة مصحوبة بابتسامة تظهر له اسنانه البيضاء التي تكاد تضئ .. وبكل طيب خاطر يوافق للمرأة التي تبادر بوضع الطقمين في حقيبتها اليدوية وتخرج .. ليعود التاجر متشوقا الى حديث الشيخ الوقور ليتسمتع بالحديث مع عمله الصالح ... والحديث لم يخرج من تعداد أعمال الرجل الخيرية والتي يبدو ان عمله الصالح درسها دراسة مستقيضه .. ليخرج بعدها الشيخ الوقور بعد ان احتفظ بأحد الخواتم الغالية زاعما للتاجر ان يذكره فقده بعمله الصالح كلما افتقده .. ووعده بالعودة في مقبل الايام لدراسة اعمال البر والتقوى والمشاريع الخيرية القادمة التي تلاقي استحسانا في السماء وتجعله يفتخر به دوما ..

جلس التاجر مقضيا باقي يومه سعيدا يريد أن يحكي قصته للآخرين لكن خاف من الرياء وان يبطل عمله الصالح فلا يعود اليه أبدا ..

وفي المساء عاد للعمل من جديد منتظرا زوجة الجراح مع زوجها وتكملة الصفقة .. لكنه عد اليوم ولم تأتي .. وقال ربما حدثت لهما ظروف منعتهما من الحضور .. وفي اليوم التالي لم تحضر .. وفي مساء اليوم التالي عندما زاد توتره تذكر الكرت واستخرجه متصلا على الدكتور يسأله عن أخبار زوجته لعلها لم يصيبها شر .. ليصدمه الدكتور بأن زوجته ماتت من سنتين ولم يتزوج بعدها .. وقبل ما يفيق من الصدمة تقع عينه على صورة الشيخ الوقور أي عمله الصالح بصحبة السيدة اياها في الجريدة مع عنوان بارز القبض على أكبر عصابة متخصصة في سرقة محلات الذهب والمجوهرات ...

اللاشئ

بعد أن هدأت الامطار العنيفة  صباحا والتي أرقت مضاجعهم ليلا ومنعتهم من النوم الآمن خوفا من سقوط سقف البيت على رؤوسهم .. قرر ان يركب المواصلات ليتفقد بيته الملك في تلك المنطقة النآئية في ضاحية المدينة و الذي أدخر فيه جهد السنين ليكون لهم ملجأا ينقذهم من سطوة الايجار وسلاطة مالكي العقار .. تناول المفاتيح من زوجته وركب المواصلات حتى وصل حيه الجديد .. وصل حيث من المفترض أن يكون بيته هنالك لكن لم يجد سوى البوابة التي يزينها باب الحديد المزخرف الجميل وعمودين من المطوب الذي بني بعناية وقوة .. وغير ذلك لاشئ .. وقف الباب وحده كشاهد القبر ... بل هو كذلك فعلا شاهدا على قبر مدخراته وخلفه فضاء لاشئ فيه يدل على انه كان هنالك بيتا .. بل لو لم يكن يعرف بوابته التي أجتهد في تلوين زخرفتها لما عرف أن بيته كان هنا ..ربما ظن أنه ضل المكان ..

وقف فكر ثم ضحك بهستريا الكوميديا السوداء ....ولكنه فجأة قرر .. قرر أن يفتح الباب بالمفتاح مثل ما كان ناوي أن يفعل ويدخل من خلاله الى هذا الفضاء الى هذا اللاشئ ... ربما خطر في باله ان تكون البوابه سحرية تنقله عبر الزمن الى عالم آخر كما شاهد في أفلام السينما .. فتح الباب فعلا واصدر صريره المعهود والذي خيل اليه كأن الباب يضحك عليه شامتا ... وولج عبر الباب الى الفضاء الى اللاشئ من جديد ...

المترجم الخاص

نحن كأمة واحدة وكقومية واحدة ولغتنا الرئيسية هي اللغة العربية قد نختلف في طريقة نطقها حسب بيئتنا ولهجاتنا المحلية .. ولكن رغما عن ذلك لا نحتاج الى مترجم خاص بيننا حتى يفسر لنا ماذا يقول الاخرين . ولكن لست هذا ما اعنيه .. انما قصدت بالمترجم الخاص .. هو انه داخل زهن او عقل أي شخص منا مترجم خاص به يترجم الحدث وليس الكلام فقط الى احاسيس وشعور ورد فعلا ايضا والدليل على ذلك تجد عبارة ما تقولها لشخص معين يفرح بها ونفس العباره شخص آخر يغضب منها ... اقرب الصورة با مثلة ...
مثلا شاب حب يتغزل في بنت فقال لها (مرحبا يا موزة).... المترجم الخاص للبنت ممكن يقول ليها يقصد الشاب انك انت ناعمة وحلوة وخالية من الحموضة ونكهتك عطره مثل الموزة تماما ... وهي يعجبها تفسير المترجم وتبتسم وترد ( مرسي ) ونفس العباره قد يقولها لبنت ثانية ويترجم لها المترجم ...( الشاب دا قصده شنو الا كان قاصد انك شينة وظهرك مقوس زي الموزة .. او انك زواغة وبتزحلقي الرجال زي قشرة الموز .. فجاه تجد البنت وجهها تعكر ... وتقصد شنو انت يا ..... وبدات المشكلة .
ظاهرة المترجم الخاص والتي ربما هي ما يطلق عليها الوسواس في كثير من الاحيان ليست متعلقة بالكلام فقط انما ايضا في تفسير الاحداث العمليه ... حتى في الهدايا قد تقدم لك صابون حمام نوع فاخر كهدية لاحد الاشخاص .. ولكن يظهر عنده المترجم .. ويقول له : ( فلان يعزك واهدى لك هذا الصابون الجميل تعبيرا عن حبه لك .. فاشكره لو سمحت ).... متشكرين يا ابو الليل ياخ انشاء الله ما عدمناك .... وواحد اخر يمكن يكون مترجمه شرير فيقول له ...( يقصد شنو صاحبك دا اللهم الا كان شم فيك ريحه كدا ولا كدا ) وفجاه تفاجا بان صاحبك رمى الصابون في وجهك وذهب غاضبا .... الله الله الله مالك يا شيخنا ... (ولا شيخك ولا زفت وتاني ما تفتح بوزك دا معاي ).
والمترجم الخاص ليس بالضرورة ان يكون دوره محصِور في الخير والشر فقط .. انما الحياة الروتينية العادية ... وفي بعض الاحيان يكون ملهما للتاويل .. او تخيل الاحداث ... مثلا سمعت صوت انفجار من مكان بعيد وفجاه تجد واحد انبرى للتفسير ويقول لكم ( دا صوت انبوبة غاز ) من اين ومتى وصلته المعلومة ... هذا من النوع الذي له مترجم ملقوف (شليق ) يفتكر نفسه ان له قدره على تفسير أي ظاهره غيابيا .... 
وحتى في سماع الاغاني مرات الاغاني انت تسمعها بطريقة محتلفة عن كتابتها ومعانيها حتى لو كان النطق هو نفس النطق وانا شخصيا عندي عدة تجارب من هذا النوع .. اولها اغنية الجريدة للاستاذ محمد الامين والشاعر فضل الله محمد ... متعهما الله بالصحة ....
والاغنية مطلعها كلنا عارفنه ... سارحة مالك 
ونحن طلبة في المدرسة الثانوية .. جات حافلة ركاب وكعادة اصحاب السيارات عندنا في السودان يكتبون عبارات او اغاني وكان مكتوب على الحافلة عبارة ... سارحة مالك وانا اول مره اشاهد مطلع الاغنية مكتوبا ...
وانا فاجات الجميع بقول ..
بالله هي سارحة مالك ؟؟؟؟؟ .. وسالني احدهم .. وا نت كنت فاكرها شنو ؟؟؟؟؟
رديت انا طول عمري فاكرها :
سار حمالك
طيب يعني شنو سار حمالك ؟؟؟؟
يعني البنت وهي حبيبة الشاعر عندها حمال وبعدين هذا الحمال سار وسابها لوحدها ......
طيب ماشي ماهو الحمال؟؟؟؟
يكمل .......................

الرميلة بقعة ساحرة في شرق السودان

مياسة

نظر اليها في ظلمة الليل المعتمة من خلال نافذة مسكنه الجديد بالقرية التي اتى اليها منتدبا كظابط اداريي اوكل له مهمة تطوير وتحسين القرية ,من بعيد تبين له شبح جسدها المدهش وخطوطه العريضه  وهي تتثنى وتتمايل,

لم يتبين ملامحها ولكن اعجب بالخطوط العريضة لجسدها المياس 

والذي يتمايل كلما رفعت يدها تعيد شعرة شاردة الى رفيقاتها ... بصورة مثيرة احالت جسده الى كتلة من نار وقلب يخفق كاد يخترق القفص الصدري ...

حركاتها تدل على انها تتحدث على تلفون جوال .. لان حركات يديها تدل على ذلك

ركز عليها نظره لكن كان الظلام يبين شبحها كالظل فقط دون ملامح .. ولكنه ظل لاجمل جسد في العالم

هكذا قال في نفسه حاول ان يرفع صوته في الظلام لكنه خاف يلفت اليها الانظار .

قرر الاقتراب منها في خطا بطيئة حتى لا يلفت الانظار او يخيفها فتنفر .. اراد ان يدعى كانه قربته الصدفه منها . ونفذ الفكرة فعلا خرج من السكن فعلا وقفل الباب من خلفه بحرص حتى لايحدث دويا فيوقظ الآخرين  وبدو يخطوا تجاهها ..

عندما وصل بضع امتار منها قال لها : لو سمحتى محاولا لفتها لم تجب لكن خيل اليه انا التفتت بل اكثر من ذلك ابتسمت له وبرقت اسناناها البيضاء في الظلام وواصلت في ميولها مع جوالها .

تقرب اكثر واكثر واكثر متشجعا بالنظرة والابتسامة ..

حتى كاد يلتصق بها ليكتشف في النهاية انها ليست سوى شجرة عشر ..بثمارها المتكورة وورقها العريض وسيقانها المرنه تلعب بها الريح كيف تشاء .

ريبورتاج بيت العرس في السودان

بيت العرس مصطلح عندنا في السودان يطلق علي اي بيت ستقوم فيه مناسبة زواج     قبل وبعد خمسة عشر يوما من قيام المناسبة .. وقد تزيد هذه المدة او تقصر .. بالتالي اي بيت عندنا فيه شباب من الجنسين في سن الزواج والتي يمكن ان تبدا من خمسة عشر عاما عند البنات وانت صاعد وعشرين عاما عند الاولاد قد تكون اقل في الريف او حتى في المدن في ظروف معينة ( يكون الشاب وحيد والده الثري .. ويريد ان يفرح به ويشوف جنى جناه .. او كما يقال ) .. لكن قبل ان يتحول البيت الى بيت العرس .. انا عبر هذا الموضوع ساسلط الضوء على بيت العرس في السودان في شكل ريبورتاج .. بمعنى ساستخدم عدة وسائل قد تكون تقرير او اسكتش او مقال حتى نبرز هوية بيت العرس عندنا في السودان .. وبيت العرس فيه ميزات تدقدق جميع حواس الانسان .. مثلا دق وتحضير العطور المميزة من بخور وخلافه تلامس حاسة الشم... تعليم العروس والذي يستغرق عدة اسابيع قبل المناسبة من انغام وغناء تلامس السمع .. وكذلك صيانة البيت والطلاء تلامس النظر...

المرحلة التي تسبق بيت العرس في السودان .. هي مرحلة الخطبة ومن المفترض انها هي تعتبر مرحلة الكتمان .. ولكن نحن عندنا طريقة عجيبة في الكتمان نسيقها في المشهد التالي ..

- علوية عندي ليك خبر بس حلفتك ما تقولي لزول لانه هو سر وقالوا لي ما تقوليه لكن انا عشان بعزك .

- قولي يا سعاد وسرك في بير غريقة ( الظاهر عليها بير ارتوازية ومركب علية مضخة رشاشة ) .

- سمعت قالوا محمد ود ستنا اتقدم لعفراء بت احسان بس حلفتك ما تقولي لزول

- هي يعني الخبر دا صحي انا قالتو لي سارة بتي وقالت كلمتها عفراء نفسها ولكن برضو قالت ليها سر وما تقولو لزول الخبر لسع داسنه .

ويظل هذا الخبر السري المدسوس يعم كل القرى والحضر بنفس الصيغة ( سر ما تقولوا لزول ) وعندما يحضر العريس في الاجازة يستقبله الرجال بابتسامة خبيثة .. حمد الله على السلامة يا عريس .. اها ما نويت المره دي ولا لسع ما لقيت بت الحلال ( تعقبها ابتسامة خبيثة تدل على ان كل البلد عرفت من هي بت الحلال المرتقبة ) ..

الولد يرجع يعاتب امه واخواته : يا ايمه انا اقول ليكم شوفوا لي عفراء مرتبطة ولا لا اجي الاقي كل السودان عرف انه انا سالت منها .

الام : هاي يا ولد الزمن دا في شئ بيندسه .. تلاقيك انت بخشمك الخفيف دا اتنوست بيها في الغربة والمغتربين النازلين وطالعين ديل نقلوا الخبر ( عبقرية تحويل الدفاع لهجوم عند الامهات .. الله يحفظهن ) ..

ويجد العريس الذي تجرا وسال عن بت شاهدها في شريط فيديوا مدفوع دفعا من كل المجتمع لزواجها ...

والى الخطوات الاخرى التي ستحول بيت عفراء ومحمد الى بيت عرس ..

من انتشار الخبر وهمس الناس وحرارة استقبال العريس من اهل البنت المختارة .يعرف العريس بانه ابواب الخيارات الاخرى قد قفلت تماما .. وعليه ان يعلن الحرب اقصد الحب ...:بعبارة من نوع : يمه خلاص امشوا للجماعة ديل وافتحوا الخشم ( فتح الخشم تعبير سوداني يشير الى الطلب الرسمي المعلن وليس له اي علاقة بطب الاسنان بمعنى يفتح فم العروس ويفحصوا اسنانها كانها نعجة او خروف ).

الام تقول : نفتح خشمنا كدا مجان يا ولدي ما تدفع خلينا نديهم انشاء الله مليون .. وهي اشارة الى ان فتح الخشم هو عبارة عن مبلغ من المال اشبه بالعربون في الصفقات التجارية لانه لا يكون خصما على اي بند من بنود الزواج الاخرى التي تشمل المهر والشيلة والدكان كما انه غير قابل للارجاع في حال فشلت الخطبة ...

تاخذ الام جاراتها المقربات واخواتها اي خالات العريس .. في وفد رسمي عدد معقول يتكون من ست الى سبعة نساء ليس بينهن بنت صغيرة او عزباء وان كان يجوز في بعض الاحيان اذا كانت العروس صديقة اخت العريس او زميلتها في الدراسة .

عملية فتح الخشم هي المرحلة التي ينطلق فيها الزواج من منطقة الكتمان المذكورة سابقا الى مرحلة العلن .. وهي المرحلة التي يتحول فيها البيتين الى ما عرف بمصطلح بيت العرس .. ويبدا الجيران يستخدمون هذا الاسم لذكر اي موضوع يتعلق بالبيتين ..

_ يابت امك وين ؟؟

- راحت بيت العرس يا ابوي

- ياولد ابوك راح الشغل ولا شنو؟؟

- لا يا عمي قاعد في بيت العرس يتونس هناك

بعد فتح الخشم اي الخطبة المعلنة تبدا منها اجراءات منها تحديد يوم القران والذي تسبقه الحنة وقبلهم الشيلة والتي غالبا ما يحضرها المغترب معه بعد ان يكون اشتراها من بلاد الغربة واستعان في شرائها بزوجات اصدقائه او اخواته ان كن في الغربة . والتي غالبا لن تعجب العروس وتبدا في تغييرها بمجرد ما تستلمها وتعرف ان اخوات العريس هن من اشترينها ..

من تاريخ تحديد الزواج بعد الخطبة المعلنة والتي تعارف عليها الناس باسم فتح الخشم تعقبها خطوة اكثر رسمية .. وهي يتقدم والد العريس واعمامه وخيلانه لطلب يد البنت رسميا ( يعني طلب كرت العروس من الفيفا )( لا ادري لماذا يطلق على خطوبة البنت (طلب يدها) .. اشمعنى اليد من دون اعضاء الجسم ) .. المهم بعد ذلك يبدا اهل العروس واهل العريس يطلقون على بعضهم البعض كلمة ( نسابتنا ) مثال ممكن تسمع عبارة ( تعرف نسابتنا ناس عبد الغفار ديل امس جاهم حرامي )..

وبعد الخطوبة وتحديد موعد الزواج والتي تكون قصيرة عادة اذا كان العريس مغترب واجازته محدودة وسيترك العروس خلفه ويبحث لها عن طريقة استقدام بعد ان يقضي معها باقي اجازته شهر او اقل .

لذلك اول خطوة هي طباعة الكروت تطرقت لجانب منها في موضوع ( مواقف مع كروت الافراح ) بحكم عملي السابق كمدير لمطبعة بالسودان .. فاهلنا عادة يطبعون عدد كبير جدا من الكروت ربما يكون اكثر حتى من معارفهم . وبعد ذلك يحتاروا في توزيع هذه الكروت .. حتى يستعينوا بكشوفات اللجان الشعبية والتي عادة لاتحدث ابدا لذلك يوجد بها كثير من المراحيم والمتوفين .. وانا اشهد بان جارنا وصلته دعوة لتناول وجبة الغداء بعد وفاته بخمس سنوات ( الله يرحمه ) وذلك لان الناس ياخذون الاسماء من القوائم وينزلونها في الكروت ويوزعوها دون اي دراسة.

مع بداية طباعة الكروت توجد ظاهرة عجيب واعتقد هي ميزة من ميزات الشعب السوداني .. وهي مجموعة من المتطوعين الشباب دعونا نطلق عليهم اصدقاء العريس وهم مثل اصدقاء الشرطة او اصدقاء البيئة .. مجموعة من الشباب دون اي انذار او خطوة مسبقة تجدهم تولوا زمام الامور في بيوت المناسبات وبداوا يوزعون الادوار والمهام على بعضهم البعض .. بدءا من الكروت .. والغريبة كل واحد منهم يحس بانه اهم من الاخرين وتنطبق عليه اغنية ترباس ( انت المهم والناس كثير ما تهمني )

قد تكون لهم مارب اخرى من وجودهم في بيت العرس ..كان يختلطوا بالبنات مثلا .. واصلا بيت العرس يتحول الى مجمع للغزل المتاح . ورغما ان البنات في كثير من الاحيان يستخفون باصدقاء العريس ويطلقون عليهم القاب من نوع ( عماد رشاقة وخالد خفة وهكذا ) انا في الاول كنت مفتكر ان مدينتنا هي فقط تتميز بوجود هؤلاء الاصدقاء لكن بعد ذلك شاهدتهم في كثير من مدن السودان بما فيهم ودمدني والخرطوم وبورتسودان .

واصدقاء العريس يتولون في البداية تعبئة الكروت وكذلك توزيعها تسمع جمل طايرة هنا وهناك من نوع ( انا ادروني كروت المنطقة صناعية ، وواحد ثاني كروت حي البوستة ديل خلوهم لي .. وواحد ثالث انا خلو لي ناس السوق .. وهكذا .. توجد كل واحد تولى تعبئة وتوزيع حوالي العشرين كرت ) ليفاجا العريس يوم العرس بانه لا يعرف ثلاث ارباع المدعويين باستثناء الاهل والجيران ... بل اكثر من ذلك احيانا يتفاجا باحد يلومه وهو يكون اول مره شاهده في حياته ويدور حوار كالتالي ..

- شنو يا عريس ما بتعزمنا مالك .. والله نحن كان ما معزة حاج خضر بالسمع ساكت جينا .

- يا اخوانا اسف طبعا زي ما عارفين انا جيت واجازتي قصيرة وطولت من البلد ( ويبدا يخلق في اعذار رغما عن انه يمكن يقسم بذلك في حياته ما شاهد الشخص الذي يعتذر له الان ).

سنعود للنقل لكم مشاهد من اليومين السابقين لبيت العرس

خلال اليومين الذين يسبقان العرس

تدب حركة نشيطة جدا في بيت العرس قوامها النسوة والبنات من الاهل والجيران والاقارب والاخوان بقيادة اصدقاء العريس .. فلاصدقاء العريس قدرة عجيبة في تولي القيادة . وبدلا ما هم يكونوا منتظرين الاوامر .. هم يصدرون الاوامر والعريس بالنسبة لهم يتحول الى بنك ممول فقط وخاصة اذا كان مغترب يحمل كثير من الريالات التي ادخرها خلال ثلاث سنوات . لاصدقاء العريس القدرة على تبديدها خلال اسبوع .. اي ما تبقى منها بعد ماتكون ام العروس قد خصمت كل بنودها الاخرى من نوع ( حق الحنانة وحق الكوافير وحق الخياطة وحق العلامة وحق الخبيز وحق العجين وحق الحق ) لكل ام عروس قدرة عجيبة في فتح بنود جديدة من الصرف ترفع للعريس فورا .

والعريس اذا كان مغترب فترة طويلة من البلد تجاوزت العشر سنين ولم يحضر مناسبة في السودان تجده مندهش من افعال اصدقاء العريس وتجده يمشي خلفهم بهبل واضح وهو يفرك يديه ويشكر فيهم بعبارات هم عادة لا يسمعونها من نوع (يا اخوانا ما قصرتو والله .. ربنا يقدرنا على جزاكم ... انشاء الله في افراحكم .. انشاء الله ما عدمناكم ) وهم لو انتبهوا له سيرد احدهم بغيظ ( تشكرنا على شنو يا ابو الشباب دا ما واجبنا نحن .. انت بس ربنا يهنيك )..واصدقاء العريس اصلا يستمتعون بالعرس وايامه اكثر من العريس نفسه ..

والطريف والاغرب ان اصدقاء العريس ممكن يستاذنوا من اشغالهم في اليومين الذين يسبقان المناسبة .. والغريبة دائما ينجحوا في اخذ الاذن . في حين ممكن يكون اخوان العريس واعمامه اي اهل المناسبة انفسهم مداومين في اعمالهم بصورة روتينية .. وقد حدثت معي انا فعلا يوم زواج اخي الاكبر .. قبل يوم من العرس انا كنت مداوم في العمل واصدقاء العريس مؤجزين ومعسكرين ببيتنا .. بل اكثر من ذلك كانوا يمرون علي في مكان عملي بصحبة العريس ويكلفوني ببعض المهام .. بل احدهم كلفني بمهة احضار نشارة العرس .. واصر والح بانها ضرورية جدا .. دون ان يقول لي ما هي فوائدها واستخداماتها ودورها .. وانا فعلا اجتهدت وارسلت العمال في ان يبحثوا لنا عن نشارة لاتمام زواج الاخ ..

ولسوء الحظ او لحسنه لا ادري صادف في تلك الفترة انه كانت توجد منظمة تعمل في ابحاث الطاقة البديلة .. واشتروا كل النشارة من السوق لدرجة اعتقد ان النجارين اصبحوا يجمعوا الاخشاب وينشروها حتى تتحول لنشارة ويبيعوها .. ,اخر مرة زارني فيها صديق العريس متفقدا موقف النشارة وفجعته انا بالخبر صفق يديه وذهب متاسفا .. وخفت انا من اتلاف زواج الاخ لدرجة اني فكرت اشتري لوح خشب واعطيه لنجار واطلب منه ان يفرمه لنا سفري .. لكن تريست والحمد لله بعد ان انقضى العرس عدت .. وسالت صديق العريس .. لاني لاحظت كل خطوات العرس بدءا من الماذون وانتهاءا بالفنانين لم يطلب اي واحد منهم النشارة ..سالته : ( انت يا درش النشارة كنت عاوزها شنو ؟؟) رد لي بغيظ واضح ( ما للثلج يعني لشنو حتكون ) والجدير بالذكر ان الزواج كان في ايام الشتاء والثلج ظل ثلاثة ايام بعد المناسبة دون ان يذوب ودون ان يحتاجه احد لدرجة طمعتني انا فكرت ان احتفظ به حتى موعد زواجي .

لاحظوا نحن الان نتحدث عن بيت العرس عندما يكون العريس هو الرجل بحيث يختلف الوضع عندما يكون البيت هو بيت العروس اي الانثى .في اليومين الذين يسبقان العرس تبدا مراسم الحنة .. وعادة يحدث صراع في الحنة الاولى حيث تظهر في بعض الاحيان واحدة من خالات العريس او عماته وتقول ان الحنة البيضاء ستكون في بيتها وهي من زمان ناذرة انها تخت حنة خالد البيضاء في بيتها .. والحنة البيضاء مقصود بها هي اول حنة يختها العريس في رجله والتي تحول رجله من اللون الابيض ( اصطلاحا) الى اللون البني او الاحمر حسب لون الحنة .. ويحدث صراع بين ام العريس وعمته في انه كيف ولدها يتحنن في بيت ثاني .. ,قد يحدث خصام ربما يحسمه واحد من الاقارب المتدينين بعبارة اصلا ان الحنة للرجل حرام شرعا .. ويبدا الاثنان يتنازلن عندما يكتشفن ان الموضوع في طريقة للالغاء برمته

يوم حنة العريس :

هو عادة يكون قبل العرس بيوم .. وهو نفس اليوم في معظم الاحيان الذي تقام فيه دعوة العريس سوى كانت غداء او تناول المرطبات او عشاء مع الحفل .. العريس يكون سبقها بعدة جلسات حنة غير رسمية وهي كما ذكرنا الحنة البيضاء او يمكن نسميها حجر الاساس .. والحنة هي رمز سوداني يعلن للكل وبقوة ان هذا الشخص فلان قد انتقل من طور العزوبية الى عالم الاسر اي سيسمح له بدخول الاسواق العائلية في الغربة .. لكن طبعا بعد ما يستقدم الزوجة .. اي هو مشروع رب اسرة قادم .

خلونا نقف عند دعوة الغداء لاهل العريس التي تسبق حفل الحنة .. عادة يقام سرداق ضخم امام بيت آل العريس . وبمساعدة اصدقاء العريس والذين يكونوا مساهرين حتى الصبح قبل الحنة .. بعضهم يكون ذهب مع الطباخين لشراء الخضار وبعضهم يكون ذهب الى زريبة المواشئ لشراء الخرفان والعجول .. والبعض الاخر انشغل بتركيب الصيوان وتجهيز مكان الدعوة ..

كل مرة يظهر واحد منهم للعريس يطلب عربون من المال لمهمة ما .. ( اقول ليك يا عريس اطلع لينا بعشرة الف نحجز بيها الرغيف من الفرن .. وواحد ثاني خمسين الف يا عريس عربون بتاع الساوند .. ويا عريس ما اديتنا حق الببسي .. ويا عريس الفنان خالد سكسك دا قال متبرع ليك بالحفلة حا يغني مجانا بس عاوز خمسمائة الف بتاعة العازفين والذي منه وكدا ) والعريس غرقان في موجة فرح تحت زغاريد الاهل والخالات والشابات ( يسلسل في الاموال بدون اي حساب او مراقبة .. لا من نفسه ولا من اي احد آخر ...) وكل ما يحاول يفكر او يركز تلهيه عبارة من نوع ( ابشر يا عريس ) منطلقة من احد اعمام او الجيران صانعة فيه فرح مؤقت كفيل بتطيير الهم والتركيز في الحساب خاصة اذا أعقبتها زغرودة من واحدة حسناء.

يوم الدعوة في الغداء يظهر اناس جدد اكبر في السن لهم ايضا مهام وسلطات وصلاحيات انتزعوها انتزاعا ولم توهب لهم ،على دعوة الغداء بالذات وهم معنيين بتوجيه الصواني .. اي دورهم رقابي .. وهم ربما كانو اصدقاء عريس في صباهم .. والان نزلوا معاش واصبحوا منظمي غداء .. وهم عادة لا يعملون بيدهم مثل اصدقاء العريس ولكن يكتفوا بإصدار الأوامر والتعليمات .. مثال يا جماعة انتو تفضلوا هنا ... يا جماعة غسلوا اياديكم .. انت يا استاذ اتفضل اقعد هنا سبع الجماعة ديل ... يا جماعة ناقصكم حاجة .. عايزين ضلع كمونية .. محشي اي حاجة ما تستحوا زي بيتكم ( مع انه ممكن يكون الناس الذين يخاطبهم هم اهل البيت فعلا مثل اخوان العريس واعمامه و لكن هو الغريب اي صديق العريس معاش ) .

ليلة الحنة ..

بعد ما انفض اهل دعوة العريس من وجبات الغداء .. ومن بعد المغرب تقريبا .. يبدا اصدقاء العريس في فك الصيوان ... وتغييره من شكل صالون عملاق .. الى شكل سور كبير تمهيدا لتجهيز مكان حفلة الحنة ..والحفلة عندما تكون مسورة يسهل السيطرة عليها ..

وكذلك يبداون في رص الكراسي .. بحيث يصبح المكان كانه قاعة لمسرح ... وبعد ذلك يبدا الاهل وخاصة كبار السن من النساء في اعداد معدات تقوس حنة العريس .. وهي عبارة عن عنقريب ( سرير من الخشب ) منقوش وجميل .. ويفرش عليه البرش الملون ( فرش يصنع من سعف النخيل استبدل اخيرا بملاية فخمة تصنع من الحرير وتعرف بملاية الجرتق .. ( والجرتق نفسه هو عادة سودانية متوارثه فيها شبهة الوثنية ... لان بها تقوس وبخور ولبسات غريبة يغلب عليها اللون الاحمر .. ومن ضمنها شريط احمر من الحرير يربط في راس العريس ومثبت عليه هلال من الذهب 

مشروع دعم العريس

مشروع دعم العريس عندنا ينقسم لنوعين .. نوع اول شبه الزامي وهو كما ذكرنا يعبر عنه في كرت الدعوة بعبارة العاقبة عندكم في المسرات او ودامت افراحكم واقول شبه الزامي بمعنى لو حضرت دعوة الغداء ( واتجدعت في الصينيبة وطالبت بضلع بدل فاقد واستبدال الكسرة برغيف ) وبعد ذلك خرجت دونما تدفع في الكشف لن تجد احد وقف ومسك بتلابيبك وقال لك تعال عنا ماشي وين انت داخل تكية السيد الحسن مثل ما يحدث في المطاعم .. لكن الحق يقال انه اهلنا لايذهبون الى المناسبة اذا لم يضمنوا حق الكشف في جيبهم قليل او اكثر لانها محرجة وهم حساسين .. والعبارتين في معناهما البعيد اشبه بمعنى دينونا وبتلقوه قدام .. او ردوا ما عليكم من دين .. طبعا هذا الشرح العميق يستفذ بعض الناس لانهم سيشعروا بالاهانة .. وانا لا استنكر الفكرة بل هي اشارة واضحة للتضامن والتكافل الاجتماعي .. لتخفف الناس عن بعض معاناة مصاريف الزواج .. واعانة العريس من السنة ومن الاعمال الخيرة التي حث عليها النبي صلى الله عليه وسلم . 

لذلك تجد في صيوان الغداء وهو كما ذكرنا السرداق الضخم في الطرف يجلس مجموعة من الشباب المحصلين في تربيزة ومعهم كراس يسجلون اسم الدافع ومبلغ الدفع .. وهؤلاء المحصلين قد يكونوا من رابطة اصدقاء العريس او من الجيران لان الاهل والاقارب عادة يعيبون الجلوس في صندوق الكشف ومراقبة المدعويين ( يا لكرامة هذا الشعب الابي ) لا اذكر حصل يوم ذهبت الى مناسبة في كسلا او اي مدينة اخرى ووجدت اهل المناسبة هم من يجلسون على تربيزة المحاسبة وصندوق الكشف .. 

كما توجد الطريقة الثانية لدعم العريس وهي طريقة غير محببة لحظة حفلة الحنة تجد احد الشباب استلم الميكرفون بدا يزيع في المتحصلات .. من نوع : 

شووووووووبش فلان الفلاني خال العريش خمسة مليون جنيه 

تعقبها زغاريد تزيد قوتها وتضعف وفقا لقيمة المبلغ او لاسم الشخص احيانا .. وهي تسبب حرج لبعض الناس وهي نوع من التفاخر ربما أضطر واحد تحت الحماس والتباهي والتفاخر ان يدفع مبلغا كبيرا لا يكون يمتلكه وتحت شعار ( يحلها الف حلال ) بعدين العريس يروح شهر العسل واخونا يروح السجن والعياذ بالله .

ابشر يا عريس

لا ادري ما هو اصل هذه العبارة وماذا تعني .. كلمة اعتدنا ان نطلقها كل ما مر من قربنا العريس ونحن نرفع ايادينا الى اعلى ونطرق الاصبع السبابة مع اخيه الاوسط وتحدث طرقعه اصطلح عليها الاهل بتسمية البشير او التبشير .. اي ان الحركة ارتبطت بالكلمة واشتقت منها .. والتبشير عبارة عربية وهي تعني التنبؤ بالخير او الوعد بالبشر .. ولكن ابشر يا عريس كلمة معبرة رغما عن انها مبتورة فانت لا تحدد بماذا تبشر العريس . ولكن المعنى في بطن المبشر والعريس ذات نفسه لانهما الاثنان يسعدان بها . 

وبعد ذلك ارتبطت هذه الحركة بنانا نحن السودانيين حتى في الحفلات العامة والفنان في حفلات التلفزيون يحس بانه لديه واجب تجاه الجمهور فيدور عليهم موزعا التبشيرات ليتجاوب معه الناس يبادلونه التباشير ( بدون بشاورة) 

تبشيرة العريس عرفنها هدفها ومعناها لكن ما لاافهمه هو تبشيرة الفنان في الحفلات العامة والقاعات ... في الحقيقة هي ظاهرة جديدة .. حتى الفنانين القدام ليست عندهم .. نرجع لموضوعنا ..

تخصص بعض الفنانات في زفة العريس يوم الحنة .. اي نجر اغاني خاصة به وباهله .. بعض هؤلاء الفنانات عندهن اغاني اشبه بالاستمارة فهي اي الفنانة لها قدرة عجيبة في تفريغها كل مرة من محتواها وتعبئتها باسم العريس واهله وخالاته وقبيلته ومكان عمله وخاصة اذا كان في ابو ظبي او دبي كثير ما ورد اسم هاتين المدينتين في اغاني السيرة .. بل اكثر من ذلك لهن قدرة ايضا على التقاط الاسماء العابرة وادخالها في الاغنية وهي ساخنة مثل اذا كان صديق العريس اسمه صلاح ممكن تسمع ( يا عروستو شبه التفاح عقبال عند صاحبو صلاح)..

الخلطة السرية

في القهوة الشعبية وضجيج العاملين المخلوط مع صوت الزبائن وعاملي الاورنيش .. يجلس صلاح عبد المعين او عينو كما يناديه اصحابه ... يمسك بيمينة سجارة ويسارة كاس الشاي .. وينظر الى جريدة في الطاولة بعصبية .. واضح من نظرته اليها انه غير مركز انما يده ترتجف بغضب مكبوت ... على ركن القهوة الذي اعتاد ان يجلس به عصرا حتى موعد العشاء ثم يتحرك ليكمل السهرة مع التلفزيون ومع زوجته وعياله .. ويدخل عليه صديقه عثمان مبتدرا له بسلام كامل الدسم ..

ليرد عبد المعين بائماءه فقط مدعومة بعبارة ( اهلا ) .. الطريقة مغضبة لكن عثمان  لانه صديقه شعر بأن في الامر إن 

 عثمان : الا الا الا في شنو يا ابو الشباب مالك مختصرنا كدا .

صلاح : معليش يا ابو عفان والله ما قصدي لكن بس جات فيك انت ..

عثمان : طيب خير ورينا الحاصل شنو ؟؟ مالك قافلة معاك كدا ..

صلاح : ياخي هو في غيرها المرة دي كرهتنا حياتنا ..

عثمان : اها تاني شنو مالها معاك .. زمن طويل كويسين مع بعض حسدوكم ولا شنو ..

صلاح : ياخي قوم لف يحسدو لينا شنو ياخ انت كمان .

عثمان : اها خير الحاصل شنو ..

صلاح : ياخي عندنا جارة جديدة سكنت جمبنا في البيت الجديد داك ..

عثمان : طيب وين المشكلة ..

صلاح : ياخي ما تسيبني اكمل ليك ..اها المره دي جميلة جمال ما عادي .. صحيح انا ما ركزت فيها لكن سمعت انه كل الجيران مبهورين بجمالها ..

عثمان : اوعى تقول لي ام علي غارت منها ؟؟

صلاح : ياخي اصبر ما تقاطعني عليك الله براي قرفان ..

عثمان : لا لا لا خلاص معليش كمل الظاهر عليها حكاية مولعة ..

صلاح : اها زولتنا دي صاحبتها يعني اصبحت صديقتها اها من يوم الصداقة دي تاني اخوك ما ضاق عافية ولا خت جنيه فوق اخوه ..

 عثمان ما فهمت الحصل شنو ..

صلاح : ياخي زولتنا دي بقى جنها كريمات واليوم كله حايمة في الصيديليات تجيب وتتمسح ومرات تقلب بلدي مش عارف ترمس بالطوب مرات موية الدوم بالقنقليس ..

عثمان : لا لا لا دي حكاية عايزة ليها قعدة .. هات واحد براد شاي يا معلم وكثر النعناع خلينا نسمع قصة عينو دا الله يعينو ..

اها كمان والحكاية دي ليها كم ..

صلاح : ياخي يمكن ليها زي شهر كدا .. اولا راتب الشهر الفات داك ما اكون كذبت لو قلت ليك تسعين في الماية منو راح كريمات وخلطات ..

عثمان : اها انشاء الله الصرف دا يكون جاب نتيجة ما يكون صرف في الفاضي ,..

صلاح تقصد شنو يعني نتيجة كيف ممكن تجي منه ..؟؟.

عثمان : يعني يكون شكلها اتغير وبقت سمحة زي جارتها ..

صلاح : يا راجل انسى ياخي دي كل ما تخت حاجة في وشها تظهر ليها حاجة حبوب ولا هالات سوداء تقوم تلم فيها واحدة توصف ليها شئ جديد .. يعني نحن شغالين زي ساقية جحا .. كريم يجيب مصيبة ما تروح الا بكريم تاني وهكذا .

عثمان : ياخي دا كلام عجيب طيب انت فجاه كدا انتبهت وزعلت وكنت وين من شهر ؟؟

صلاح : ما تصبر الطامة الكبرى كانت امس بالليل وانا منتظرها تجيب لي العشا .. جات خات لي صينية العشا يمين ما يا عثمان ما طالبني حليفة ما فيها غير صحن واحد فيه فول بالزيت واشك انه فيه زيت اصلا لانه الليل والكهربا قاطعة ..قلت ماشي غايتو كدا كدا بلعت في الفول ورقدت عاوز انوم ..

عثمان : اها واصل يا معلم شوقتنا 

صلاح : بعد شوية تجي رابطة ليك راسها بقطعة قماش وفيه مادة سايلة منه مقرفة .. وممسحة وشها بشئ يلمع .. قلت من باب الفضول والهزار نسالها عن انواع الكريمات الجديدة اليوم ..

قالت لي قلنا الكريمات ما نفعت ما في حل غير نلجا للطبيعة ... 

قلت ليها تقصدي شنو تلجأي للطبيعة ..

قالت : اولا الشعر الخلطة فيه دي اربعة بيضات مخلوطة مع حنة التاج الطبيعية .. والوش ممسحاه بعسل نحل سدر أصلي ..

بس قمت هجت ليك فيها وشت ليك جك القزاز .. وقلت يا ولية حرام عليك تعشينا بفول حتى زيت ما فيه وتكبي البيض في راسك وتتمسحي بالعسل يخرب بيتك وبيت اليعيش معاك ... 

يازول خافت والاولاد قاموا من النوم مخلوعين يتصارخو ا وهي انفجرت تبكي .. وتقول لي انت ما بتقدر ما انا بتجمل ليك انت ..

قلت ليها ياولية انا حصل شكيت ليك من شكلك حريقة في شكلك ذاتو .. ما انا خطبتك وعرستك بخلقتك دي ذاتها كان في حد جابرني عليك ... مش ممكن انا متاكد هسع الاولاد ديل ناموا من غير عشا وانتي متمسحة بالبيض والعسل ويمكن معاهم زبادي كمان ..

عثمان : تعرف الزبادي ينفع مع الشعر الجاف ؟..

صلاح : ياخي انت كمان ما تقرفنا وسبينا نكمل ..

عثمان : معليش قلت نعمل ليك فاصل عشان تهدا يلا كمل ..

صلاح :قلت ليها راتب الشهر كله كملتيه في الكريمات وكمان قبلتي على المواد التموينية الطلعنا بها طيب ما كان تتحنني بالطحنية وتدلكي بالجبنة عشان تتمي الناقصة ..

قالت لي ما انا ما قصدي لكن شفت في التلفزيون بيقولوا انه البشرة بتحتاج لتغذية كمان ..

قلت ليها شوفي يا ولية التغذية مهمة لكل جسم الانسان بس التغذية عندها طريق واحد خلقوا لينا الله وهو الجهاز الهضمي .. يعني الحاجات الانتي اتمسحتي بيها دي لو كان عملتي بيها العشا كان نفعتك ونفعتنا نحن معاك لانها ممكن تصل الجلد بعد هضمها عن طريق الدم ..

المهم بعد داك هدت وحاولت انا اراضيها وقالت هي وعت الدرس ..

 عثمان : يعني نفهم من كدا انه خلاص وقفت من هوس تغيير الجسم ..

صلاح : الله اعلم لكن يمكن تقبل على حاجات تانية يمكن مواد نجارة او حتى مواد بناء الله يستر بس ..

في ذات اليوم

ساهم عثمان في تهدئة صديقه بعبارات من نوع انه النساء كلهن تفكيرهن واحد وتشوبه حسن النية .. بمعنى انه المراه ممكن تضع هدفا امامها وتحاول ان تصل له بكل الوسائل ,وقال له كلنا نسائنا عندهم هنات .. لكن في النهاية ما تنسى انهن متحملات ما لا نطيقه .. ابسط شئ مثلا انت لو تركت معك الطفل الصغير عمر عام وخرجت مشوار فانت لا تطيق تتحمله ساعة واحدة تبدا تصرخ وتتعصب ربما تضرب الصغير البرئ لكن هن يتحملن الصغار بلا كلل او ملل .

تقبل صلاح كلام صديقه وفعلا بدأ يتراجع عن غضبه وعذر زوجته ام علي على حسن النية فقط لانها تريد ان تكون اجمل من جارتها حتى لا تترك له فرصة المقارنة والغيره ..

وذهب الى البيت مبكرا ولم ينسى ان يغشى محلات البقلاوة ويشتري للصغار منها مع بعض الفواكه التي نادرا ما يحضرها الى البيت مثل التفاح والعنب .. وهي خطوات عملية منه في محاولة ترضية ام علي .. لانه كما نعلم ان الرجل السوداني يعتبر ان الاعتذار ضعف لذلك يحاول ان يغلفه بالهدايا .. وهو يعتقد ان الاعتذار سيعصيها عليه اكثر ويحسسها بانه هو من كان مخطئا .. وبالتالي يصبح من حقها هي ان تتمسح بكل نعم الله حارمة منها الصغار طالما هي على حق ..

ودخل صلاح عينو بيته محدثا ضوضاء في الباب ليحسس الجميع بانه محمل بما لذ وطاب .. وسلم على ام علي مناديا على ولده الكبير علي ليدخل الاغراض الى المطبخ ودخل هو ناحية غرفته وقبل ما يدخل تستقبله ام علي موقفه له بان معها ضيوف في الصالة وعليه ان يتجه الى الصالون ويؤجل تغيير ملابسه ..

ويسالها بطبيعة الحال : منو معك .؟؟.

ام علي : سوسن جارتنا الجديدة ومعاها ضيفات بنات خالاتها ..

يعقب صلاح محاولا التظارف مع زوجته : كلهم نفس العينة ولا اقل شوية ..

تبدا ام علي تتذمر وتاخذ نفسا طويلا وتقول له متبرمه : عامل فيها دمك خفيف كمان ؟؟

يذهب ابو علي ناحية صالونه بعد ان حس بان ام علي لا زالت تحمل في نفسها منه .. ولكنه في ذات الوقت شعر بانه لمس جرحها فعلا ..

ونادى صلاح على بنته الكبيرة : تعالي يا بت يا رجاء ..

رجاء : نعم بابا ..

صلاح : روحي جيبي لي جلابيتي من الاوضة ..ومعاها جك موية باردة وكلمي خالد اخوك يجيب لي الرادي ..

بعد ان تحضر رجاء المطلوب منها يستوقفها صلاح متسائلا بفضول وغرض في نفسه .

امك معاها منو ؟؟

رجاء : معاها جارتنا الجديدة ومعاها بنات ضيوف قالوا بنات خالتها ..

صلاح : جارتنا السمحة ؟؟

رجاء : آآآآآى يا بابا سمحة سماحة انت شفتها وين ؟؟

صلاح: .. لا ما شفتها بس سمعت بيها اسمح هي ولا بنات خالتها ..

رجاء : بنات خالتها ديل حاجة ثانية خالص بس تقول ممثلات هنديات اصلا ما تقول سودانيات..

صلاح : يعني قنابل نووية عديل ؟؟ ..

رجاء ويبدو انها ما فهمت : كيف يعني يا بابا ..؟؟

صلاح : لا قصدي يعني متزوجات ولا ما متزوجات ..

رجاء : سامعاهن بيقولن لامي هن طالبات في الجامعة لكن الظاهر عليهن ما متزوجات ..

صلاح سارحا : هممممممممممممم

رجاء : قلت شئ يا بابا ..

صلاح .. لا شكرا يابتي خلاص امشي شوفي قرايتك ..

صلاح قال في نفسه لايوجد شئ يقلب كيان المراه مثل وجود فتاة جميلة غير متزوجه في محيطها او عالمها .. اذا هذه الزيارة الله يستر من عواقبها ..

وحاول ان يأخذ نومة او غفوة على بال ما يخرج الضيفات من البيت ...

بعد قليل

يحس صلاح بخطوات تقترب من الصالون ويبدو انه الضيفات يستعدن للخروج .. ولكنه تفاجأ بان زوجته تنادي عليه ..

ام علي : صلاح تعال سلم على الضيوف ديل قبل ما يخرجوا ..

ويخرج فعلا يسلم عليهن وزوجته تعرفه بهم : جارتنا احسان وبنات خالتها ندى واشراقة طالبات بكلية الطب والصيدلة .

صلاح متمتما ومتلعثما .. هو صحيح انه لم يجرأ ويمعن فيهن النظر لانه خجول لكن يبدو ان ما ابصره كان كافيا ليدخله في نوبة سعال وارتباك ..وهو محاولا استخراج جملة مفيدة من بين ركام هذا الانفعال المزعج ..يا جماعة ما بدري ما تتعشو معانا ..

لترد احسان بصوت فيه دلال يبدو انه طبيعي غير مصطنع كما قال في نفسه لانه كل شئ فيها يبدو طبيعيا : متشكرين يا ابو علي .. تعرف سامي اتصل بي وقال جايب معاه ضيف على العشا خليها مرة ثانية ..

ويخرج الضيفات مودعات ليقف صلاح في مكانه متسمرا حتى تنبهه زوجته بغيظ ويبدو انها ندمت على مناداته للتسليم على الضيفات .. هي كانت تريد ان تستعرض ثقتها في نفسها امام صديقتها لكن موقف زوجها المرتبك المتلعثم ادخلها في حرج وهز هذه الثقة .

ام على : ها شنو يا راجل سرحت وين ما تمشي تكمل نومك ..

صلاح محاولا اغاظتها : هع زي ديل يكون كريمات شنو البيستعملوها ديل طبيعي في طبيعي .

ام علي : القال ليك منو عندهم وصفات سرية قالوها لي وهسع حا اكتب ليك حاجات في  ورقه تجيبهم لي من العطار  ..

صلاح : لو حاجات حتخليك تشبهيهم كدا انا هسع البس بنطلوني وجري اجيبهم ليك ..ياخي ديل عرفنا حب الشباب قدرو عليه وطفشوه الباعوضة دي عملو ليها شنو بعند وشيهم ما تجي ؟؟ ما شاء الله ..

ام علي بغيظ : يا راجل كمان اسحر بنات الناس ..

صلاح : ماقلنا ما شاء الله .. يلا تعالي ورينا الوصفة السرية سريع ..

ام علي : يلا طلع ورقه وقلم واكتب 

ابو علي يستخرج ورقه وقلم ويبدأ يكتب .

ام علي : اولا ربع كيلو زعفران

ثانيا نص كيلو زهرة البابونج وقزازة ربع لتر زيت خروع وزجاجة زيت زيتون وزيت الحبة السوداء .. وتغشى سوق الخضار تجيب معاك ربطتين بقدونس وربطتين كمون اخضر يعني شبت البت قالت كمون اخضر يعني شبت ..

صلاح : الحمد لله ما قالت كمونية .. معقولة البنات ديل الحاجات دي كلها في وشهن ..

ام علي : اسكت ساي الظاهر علينا نحن بس الهاملات عشان شوية بيض وشوية عسل عاوز تطين عيشتنا ..

 ويحمل صلاح ورقة المكونات ويخرج للسوق ..

الخلطة السرية

ويحضر صلاح مكونات الخلطة كما وصفتها ام علي محضرا معها العشا له ولاسرته ..

وبعد ما تعشي ام علي الجميع تحضر ادوات الخلط في الصالون عند صلاح حتى لا تزعج الاطفال وتمنعهم النوم كما قالت وتبدا في التركيب ولكن قبل ماتبدا تبدا تفكر وتتذكر ..

انتي يا محاسن هي البنت ندى قالت لي تخلطي البقدونس والشبت مع زيت الخروع اولا ولا مع زيت الزيتون تتساءل مع نفسها بصوت عالي ... مقاطعها ابو علي ..

ابوعلي : هي ندى السمحة فيهن ولا الاسمح منها ؟؟

ام علي : اسكت ياخ ما تلخمنا .. صحي يا صلاح هي قالت لي تخلطي البقدونس والشبت مع واحد من الزيوت الاثنين ما بعرف الخروع ولا الزيتون ؟؟

صلاح : طيب ماتتتصلي عليها قبل ما تبدي الخلط ؟؟

ام علي : اتصلت عليها لكن جوالها مقفول واتصلت على اختها ما بترد ..

صلاح : رسلي ليها بنتك رجاء 

ام علي : ما برسل بتي في الليل دا بعدين يخطفوها ..

صلاح : يخطفوها شنو الساعة عشرة ما جات ..

ام علي : والخطف عندو مواعيد معينة ؟؟

صلاح طيب الحل شنو الحاجات دي خطره لو ركبتيها غلط ممكن تشوهك ..

ام علي : ولا خطرة ولا شئ هي كلها مواد طبيعية لو ما نفعت ما بتضر ؟؟

صلاح : هو شنو انتي شابكانا مواد طبيعية ومال المواد الكيميائية دي جاية من المريخ ما برضو من الطبيعة هنا ومن الارض .. سم العقارب والثعابين ما هي مواد طبيعية وقاتلة جدا ..

ام علي : يا راجل فال الله ولا فالك مالك جايب سيرة القتل ..

صلاح : خلاص شوفي هنا ما في داعي للاستعجال اجلي الخلطة لبكرة لغاية ما تتأكدي .

ام علي ويبدو انها متعجلة للموضوع : انا غايتو متذكرة هي قالت لي تخلطيهم بزيت الزيتون والصباح تغسلي وشك بموية الزعفران بعد ما تنقعيه بالموية والضهر تمسحي وشك بزيت الخروع اها في المسا تلاقي وشك بدا ينور براه ..بس كنت شاكة الخلطة بالخروع ولا بالزيتون .. لكن خلاص اتاكدت .. وبدا صوت الخلاط يزن وهي تخلط البقدونس والشبت مع زيت الزيتون ليخرج مزيج لزج مقرف لونه خليط بين الاخضر الغامق والاخضر الفاتح ..

وتبدا ام علي بعمل قناع لوجهها من الخليط اي بتلطيخه بهذه الطبقة ذات الرائحة النفاذه خاصة لوجود البقدونس ..

ابو علي : انا حا انوم هنا في الصالون انتي امشي بالخمج بتاعك دا نومي مع اولادك ..

ام علي : يمين الوش الطردتو دا بكرة تبكي فيه بكا ما تلقاه ..

ابو علي : كدا امشي خارجينا هسع الريحة ختقتنا وسيبك من بكاي ..

وفي اليوم التالي

استيقظ صلاح مبكرا كالعادة يستعد للذهاب الى العمل بعد ان يوصل ابنائه لمدارسهم ..لاحظ ام علي لازالت تحتفظ بالقناع الاخضر نتيجة للخلطة السرية .. لم يكترث ويبدو انه اعتاد على شكل وجهها الملطخ دوما بالكريمات والخلطات المختلفة .. ولكن سالها من باب الروتين ..

قائلا : اها اخبار الخطلة السرية كيف معاك ..

ام علي : كويسة بس مرات بحس انه وشي يقرصني شوية ..

ابو علي : طيب متين راح تغسليها ..

ام علي : بعد شوية بغسلها بموية الزعفران .. والظهر بمسح وشي بزيت الخروع ..

ابو علي : انتي متاكده الحاجات دي بتنجح ؟؟

ام علي : انت براك ماشفت النتائج العملية كيف مع ناس ندى ؟؟

ابو علي : يعني كان بتبقي زي ناس ندى ديل يكون شغلك نضيف ..

ام علي يبدو انها غارت : خلاص فضها سيرة هو انت ما صدقت جيبنا ليك السيرة ..

وخرج ابو علي ناحية دوامه عادي ليعود بعد الظهر ويجد انه ام علي غسلت الخلطة بماء الزعفران كما ذكرت لكن دون اي تغيرات تذكر في شكل وجهها ..

ابو علي معلقا : شنو ما قلتي وش ندى وكدا ؟

ام علي : اصبر ما انا لسع ما مسحت زيت الخروع وهو بعد الغدا مباشرة .. 

وبعد الغداء تمدد ابو عليا غافيا نحو نومة بعد الغداءالتي اعتادها .. ليصحى بعد قليل مفزوعا على صوت صراخ وعويل .. بعد ان وعي تيقن انها زوجته . 

: الحقني يا صلاح انا انتهيت الليلة وووب علي وووب علي .. 

يجري صلاح مفزوعا ناحية غرفة زوجته ليجدها امام المراه ووجهها منتفخ ومحمر كانه صب عليه ماء حار وبدا يكاد ينفر منه الدم .. وهي لازالت تولول وتثكل :: الليلة ووووب يا محاسن الاتشوهتي ..  

صلاح بدا يسالها منفعلا : في شنو يا وليه العمل فيك كدا شنو ..؟؟؟ 

ام علي : زيت الخروع بس مسحتو كدا دقيقتين ووشي ولع نار .. 

ابو علي : البسي ثوبك سريع خلينا نحصل المستشفى ..

وفي المستشفى يتم اسعاف ام علي بحقنها بمادة مضادة للحساسية اذا يتضح انه جسمها حساس ناحية الخروع .. 

ويعود الزوجان الى البيت بعد ما تم اسعاف ام علي وعاد اليها وجهها الطبيعي .. 

وجرت اولا ناحية المرآه لتتاكد من عودة وجهها لطبيعته وتوبيخات زوجها تلسع ظهرها لسعا من نوع : انتو خلقة الله دي مالها ما عاجباكم ... اللون الخلقة ليكم الله دا ما نعمة في ناس مالاقينه ربنا مبتليهم بالبرص والامراض والعياذ بالله لتقاطعه ام علي : خلاص كفى كفى ما قلنا ليك ثاني بس موية الوضو دي غيرها حرمانة حاجة تلمس وشي دا .. 

لكن الطريف في المساء يعود الاختان الجميليتان ليقولوا لها نحن ما قلنا خروع في وصفتنا ولا جبنا سيرتو انما انت سمعتي خطا لاننا قلنا خروب .. 

محاسن : شوفي هنا خروب ولا خروف ولا اي شئ تاني انا وشي دا غير موية الماسورة دي ما بلمسوا باي شئ ..

وكان النهاية