هوس الحريق

يدق الباب في الثلث الاخير من الليل عند ابو عمر الذي قام مفزوعا من النوم وقبل ذلك مقدمة ( الحريق لعبة تلعب بورق الكتشينة ادمنها كثير من السودانيون وبصفة خاصة في بلاد المهجر)
يفتح الباب وفي راسه الف هاجس ربما يكونوا شرطة او جهه امنية يفتح الباب وهو يدعك عينيه حتى يستطيع فتحهما ليجده صديقه ابو علي ..
ابو عمر : خير يا ابو علي نعلوا ما في مشكلة
ابو علي : قلت ليك يا ابو عمر لو فكيت ليك البت كان جريتني ؟؟
ابو عمر : البت ؟؟ بت منو كمان ؟؟
ابو علي : ياخي بت الاسود
ابو عمر : يخرب بيتك يعني هسع انت جايي تتناقش في الحريق .
ابو علي : اسكت ساي يا ابو عمر ما تشوف الخمسين دي حرقتني كيف ياخي انا كنت فاتح قلت لكن ما افتح الا بخمسين ومطمئن وما قايلك قافل ..
ابو عمر : شوف هنا يا ابو علي انا من هنا ومن يوم الليلة تاني لا عاوز كشتينة ولا تجيب لي سيرتها ..
ابو علي : لا يا ابو الشباب معقولة تعتزل قبل ما ناخذ ثارنا ..
ابو عمر : يعني ايه تاخذ ثارك ..؟؟
ابو علي : يعني نلعب قيم حاسم هسع لو غلبتني اكون اقتنعت لو غلبتك اكون اخذت تاري ..
ابو عمر : نلعب وين ؟؟ وهسع ؟؟
ابو علي : ايوا عندك هنا في الصالون ماعندك فردة ؟؟
ابو عمر : لا انا ماعندي كوتشينة في البيت ..
ابو علي : ولا يهمك انا عندي في العربية انزل اجيبها واجي بس انت فرش الملعب .
ابو عمر : اوفففففففف بالله دي مصيبة شنو الوقعنا فيها دي ؟؟
يرجع ابو علي وفي يده فردة الكتشينة ويدخلا في صالون ابو عمر .. ويبدا اللعب فعلا وبعد قليل تسمع صرخة ابو علي : الف .... وحي حي حي .. الليلة وووب يلا اعتزل احي انا ..
تجي ام عمر مفزوعة هي واطفالها .. سجمي يا احمد في شنو ؟؟
يرد ابو علي :: في شنو غلبناه ليك قال عايز يعتزل قال يلا احي نشيل كشتينتنا ونتخارج بعد كدا لو عاوز اعتزل اعتزل ..
ام عمر : للدرجة دي يا احمد تخلينا ننوم وتجيب اصحابك تلعبوا في الصالون تقلبوه نادي الساعة ثلاثة صباحا هسع الجيران يقولوا علينا شنو .. انا ما قاعدة معاك بكره دي تسفرني لاهلي ..
ابو عمر : يا وليه افهمي .. والله انا كنت فاتح لكن مافي طريقه اتخلص بيها من ابو علي غير اخليه يغلبني عشان كدا انتظرتو .. وصدقيني انا في الجمعية غلبتو جا دق الباب يسال فيني عن سبب غلبه ولامن قلت ليه انا اعتزلت قال الا بعد مباراه ثاريه وانا زي ما قلت ليك خليتو يغلبني مخصوص عشان اعتزل ..

ام عمر : وتخلي يغلبك كيف؟؟ .. شوف هنا يا ترجع تاخذ تارك يا تسفرني لاهلي ..
ابو عمر : يا وليه انت بصحك .
ام عمر : ايوا بصحي يعني عاوز مرتو محاسن كمان تشمت فينا وتكرهنا المناسبات .
ابو عمر : خلاص بكره في الجمعية ..
ام عمر : لا لا لا عندي هنا دا تعزمهم عشا هو ومرتو .. ولامن تجرو خمسين عايزاك تصرخ وتقول خمسين يا ام عمر عشان انا ازغرد من جوة واغلى ليك قلب محاسن غلي ..
ابو عمر : ابشري يا ام عمر .
وفي اليوم التالي في بيت ابو علي
محاسن : انت متاكد انه ما عندهم اي مناسبة للدعوة دي يعني لا ميلاد شافع ولا نجاح اخت .
ابو علي : يا وليه ناس بيريدونا لله عازمننا عشا نقعد نتحقق ونشك فيهم ..؟
محاسن : كان بيريدونا ما بعرف ..
ابو علي : هو في ايه شنو الخلاك تشكي ..؟
محاسن : سعاد دي صاحبتي من زمن نحن بنات وطالبات بعرفها زي جوع بطني ما بتعمل ليها حاجة بدون هدف تحت تحت وزولة بتاعة مقالب وخوازيق.
ابو علي : اللهم طولك يا روح ياخي هي دي اول مرة نعزمهم ولا يعزمونا نحن البينا عامرة من زمان ..
محاسن لازالت شاك في الامر ( يتخيل لي عندها حق)
محاسن : كدي انت آخر مرة قابلت ابو عمر متين وكنتو تعملوا في شنو .؟
ابو علي : اتقابلنا امس الخميس في الجمعية اقصد الصباح الجمعة لا لا لا الخميس يعني صبحان على الجمعة .
محاسن : يا راجل مالك تقطع خميس وجمعة وصباح .. انت صحي يوم الجمعة الصباح بدري قلت اتصلوا بيك ناس الشغل وقالوا في حالة طارئة وطلعت زي ثلاثة صباحا وجيت بعد ساعة انا بعاين ليك كنت مبسوط تغني .. في شنو في الشغل خلاك تكون مبسوط وتغني .
ابو علي شعر بجرجرة محاسن ستورطه في التحقيق لو قال ليها كان عند ابو عمر وراح جراه خمسين في عقر داره وسط اهله يمكن الخبر يفرحها لكن حكاية التسلل ثلاثة صباحا دي غبر مامونة العواقب لذلك قرر ان يحسم النقاش مستخدما صلاحياته الذكورية ..
ابو علي : شوفي هنا يا وليه عايزة تروحي العشا اهلا وسهلا ارجع من الشغل الاقيكم لابسين ما عايزة قولي ما عايزة ما تملينا كلام كتير .
محاسن تؤثر فيها اللهجة الحادة وتبتلع لسانها وتذهب وهي تهز في راسها وتؤشر بيديها دليل على انها لازالت تشك في الامر ..
وفي بيت ابو عمر

سعاد : اها خلاص يا احمد الجماعة ديل كلمتهم بالعشا قالوا جايين ..؟؟

ابو عمر : والله هو ما اكد لي لكن ما اظن عندهم مانع ..

سعاد : لا شنو ما تظن عايزني اقع واقوم في العشا وما يجو ؟؟
هسع دي قدامي تتصل وتتأكد ..

وفعلا يتصل احمد بابو علي ويرجع لها يقول خلاص قالوا جايين ..

تفرك سعاد يدها وتتبسم بخبث وتقول يلا تعال نشوف حانعمل شنو في العشا ..

ابو عمر : رايك شنو انتي ما تتعبي نجيب جردل كنتاكي مع الفول والبيض والحاجات التانية ..

سعاد : لا لا لا كنتاكي بتاع شنو انا عايزاه يكون عشا كدا مميز حاجة كدا ما بيعرفوها السودانيين عشان تكون مناسبة كل ما اتذكرها اكون قاصدة الخمسين الانت حاتحرق بيها قلب محاسن وابو علي ... يعني مثلا سمك مشوي . السودانيين بيعرفوا السمك المقلي ما بيعرفوا المشوي .. اها لامن اقول تتذكري يا محاسن السمك المشوي الكان جابو ابو عمر لامن اتعشيتو عندنا ... طبعا هي حتكون فاهماني قاصده شنو اها وتتغلغل ودا الانا دايراه اصلا ..

ابو عمر يتبرم : اعوذ بالله والله النسوان ديل الله يكفينا شرهن اكعب مننا في الحريق الحمد لله ما بيلعبن .طيب لو انا حرقت ما رحت فيها معناها حا تشويني زي السمك بلسانها دا ..

سعاد : تنقنق تقول في شنو ...؟؟

ابو عمر : لا لا لا قعد اتذكر في المحلات البتبيع سمك مشوي ..

سعاد : تتذكر ليها شنو ما تمشي جمب سوق الربوة المركزي فيه رصة بتاعة محلات سمك ..

ابو عمر : يعني خلاص بقينا على السمك المشوي الناس ديل يمكن ما ينفع معاهم ..

سعاد : هو نحن حانقدم سمك وبس ما معاه الحاجات التانية .. انا السمك عايزاه رمز لليلة السعيدة .. يلا اتحرك جيب الحاجات عشان انا اجهز العشا .. ماتنسى تشتري معاك كشتينة جديدة لنج .
ابو عمر : انا قلت لابو علي اعتزلت الكشتينة اروح اشتريها جديدة ؟هو اكيد معاه واحدة ..
سعاد : هو انت الكشتينة يعني حاترصها في التربيزة . انت بس خليها في العربية وبعدين انت ما تقترح عليه خليه ابو علي براه هو راح يقعد يحنسك عشان ترجع لاني عارفاه ما بيقعد بلا كشتينة ... اول ما يقنعك انت تقول لكن ما عندنا كشتينة هو هوا راح ينزل يجيب حقته من عربيته وانا عايزه الحرقة تكون بحقته هو عشان يكون مفعولها اكيد وقوي .. ولو قال ناسيها انت تقول اتذكرت عربيتي دي كان فيها كشتينة في الضهرية اروح اجيبها اها وتجي اتفقنا ؟؟
ابو عمر خرج من البيت يكلم نفسه يقول المره دي حيرت ابليس ذاتو .. بس الحمد لله بقت مرتي انا يعني لو كانت مرت زول تاني كان التخطيط دا كله يكون ضدي .. غايتو الله يعدي اليوم دا على خير وانا لو حرقت معناها المره دي الا اسفرها لاهلها لانها راح تحرقني شهور للقدام بالكلام .
وللحريق بقية .ز